Joibe ai 31 di Otubar, aes 21.10 al va in onde su Rai Storia – canâl 54 dt – “Marcho. L’Ultima bandiera”. Il cine al conte la vere storie di Marc di Murùs, l’ultin Puartebandiere dal Stât patriarcjâl di Aquilee e di cemût che Marc, come c’al à dit il prof. Franco Cardini, «a diference di chei altris nobii, tal 1420 si jere oponût ae invasion de Republiche di Vignesie. E cussì Vignesie lu à cancelât de storie».
Il docufilm al larà in onde te tramission “5000 anni e più. La lunga storia dell’umanità”. Po dopo al sarà disponibil su Ray Play.
Il cine al è prodot de bande de ARLeF e Arte Video, cul contribût de FVG Film Commission e dal Fondo per l’audiovisivo del Friuli-Venezia Giulia.
Un docufilm al è curât di Marco Fabbro, cun Paolo Mutti, Aida Talliente, Fabiano Fantini e i intervents di Franco Cardini, Alberto Travain, Flavia Maria De Vitt, William Cisilino, Gianfranco Ellero.
Cui erial Marc di Murùs
di Roberto Iacovissi, su La Vite Catoliche dal 13 di avrîl 2023
La manarie dal boie e veve çoncjât cuntun colp sec il cuel dal cuarp za muart di Marc di Morùs, un nobil de Patrie dal Friûl che nol veve acetât di finî la sô vite sot il domini dal leon di Vignesie, e che par chest al jere stât metût in preson tal Cjistiel di Udin, dulà che al jere muart forsit par vie di une malatie. Ma la Serenissime Dominante, che lu veve acusât di convivence cun delincuents e cun nemîs politics di Vignesie, no i veve bastade chê muart, parcè che e veve di dâ un esempli a ducj i furlans che a vessin stiçât la sô paronance. Cussì, daspò di un procès farse, lu veve condanât, za muart, ae decapitazion. Al jere il 19 di Març dal 1421, e Vignesie, aromai, e jere la parone di dut il Friûl.
Marc al faseve part di un cjasât impuartant, chel dai siôrs di Arcan, che a lôr, par tradizion, ur spietave l’onôr di puartâ in vuere la bandiere cu la acuile patriarcjine; al jere, insumis, Banderarius Ecclesiae Aquilegienis. A jerin agns intrigôs, chei, cun lotis politichis che a tamesavin la Europe e, in Friûl, par zonte, cu lis barafusis tra la micragnose nobiltât furlane, dividude tra Vignesie e l’Imperadôr, come il cjasât di Marc di Morùs, imparentât cu la nobile famee udinese dai Arcolani, contrarie di simpri ai Savorgnan, che par il lôr interès, invezit, a vevin cirût il jutori di Vignesie.
Cun di fat, la ocupazion venite dal Friûl e scomençà propit cu la richieste di Tristano Savorgnan di vê indaûr i bens che il patriarcje i veve confiscâts, scomençânt a fiscâ il Friûl. No ur veve fat mancjâ, Vignesie, chel jutori ai Savorgnan, savint ben che une volte sierade la cuistion cuntun patriarcje che aromai al jere masse debil par podê resisti al esercit de Serenissime, jentrant in Friûl e varès podût sigurâ i interès di dutis lis fazions nobiliârs che le vevin judade. Magari ancje chê dai siôrs di Zucco, che cun lôr Marc al contindeve la ereditât dal cjistiel di Morùs di cuant che Fidrì, so cusin, daspò di vêndi vendude une part a chei siôrs, al veve fat testament par lassâur dute la ereditât.
Il cjistiel, intant, tal 1419 al jere stât ocupât dai venezians mintri che Marc al jere vie, forsit daûr dal patriarcje Ludovì di Teck come puartadôr de bandiere patriarcjâl, a tentâ la ultime, inutile resistence al esercit venezian, cun ae vuide doi mercenaris al servizi di Vignesie, Taddeo d’Este e Filippo Arcelli.
Il mês di Avrîl in Friûl al puarte dôs musis: chê dai 3 di Avrîl dal 1077 che e ricuarde la nassite dal stât patriarcjâl dal Friûl, e chê dai 4 di Avrîl dal 1420, che e ricuarde la sô muart, cu la capitolazion de citât di Udin di bande dai Savorgnan. Il sacrifici di Marc di Morùs al è stât ricuardât, come ogni an tacant dal 1997, ai 19 di Març passâts, dal Circul universitari furlan “Academie dal Friûl” cul so president dot. Albert Travain, cuntun mac floreâl metût denant de gatarade des presons dal cjistiel di Udin, in omaç a dutis lis vitimis di dutis lis opressions e di dutis lis injustiziis.
