Po ben, si à propit di dîsi che al popul minût come che o sin nô, se i gjavìn chê dal Vanzeli, che e compagnà i Trê Rês a Betlem a adorâ il Divin Frutin, lis stelis cometis no parin propit di bon auguri. Anzit, par solit a puartin anunzi di epidemiis, di cjaristiis, di inondazions e, cuant che no si contentin dal dut, ancje di muarts, di muarts impuartantis, di personis che a contin, parcè che pai puarins, vuelistu che si scomodi une comete? Abituâts a fâ di cont su dut chel pôc che si veve te sachete, i conts si fasin ancje pes cometis: plui lungje e sarà la code (i Romans, cjapant ispirazion dai sgarpions, a disevin ‘in cauda venenum’), piês al sarà il malan, e plui timp si fasarà viodi tal cîl, plui timp al durarà.
Ma nol baste, che se al pues plovi sul bagnât, al plovarà, parcè che al è pussibil che par dulà che e comparìs la comete, e podarà rivâ ancje une vuere. E cheste le tignìn par ultime: se une comete dome e sfrisse la tiere, e podarès rivâ la fin dal mont. A voli e crôs, fin a cumò, nol devi jessi mai sucedût, ma no si pues mai savê… Dut câs, par dîle dute, prin che al sucedi, si previodin siet agns di grande bondance, siet agns di grande cjaristie, siet agns che lis feminis a fasaran fîs come cuninis e siet agns che lis feminis a restaran sterpis. Si trate di vincjevot agns, e un al à il timp di preparâsi.
Insume, al è il timp de Apocalìs, la rivade de bibliche Besteate, che di chestis bandis le clamin l’”Anticrist cu lis dalminis di glacins”. In Friûl, che no si sa se in chei agnorums a son rivâts a viodi la comete di Betlem, di cometis a ‘ndi son stadis viodudis tantis, almancul a lei ce che a contin i nestris croniscj, a scomençâ cun Robert, no jo, ma il cont di Spilimberc, che al scrîf che ai 14 di Avost dal 1531, cui siei voi, al à viodude comparî une comete che si jere fermade parsore il cîl di Midun, che il so cjâf al lusive plui de code, «…e durò ore due e andò a monte la stessa e si disfese lo splendor».
Inutil contâ la pôre di chel puar cont: «Messer Domeneddio ne adjuti, che non sapemo ne podemo». Un vêr e propit record di durade di une comete in cîl al è sucedût tal 1618 cuant che, secont un altri cont, Cristoful di Pramper, e comparì une stele comete cu la code a forme di barbe, clamade “Auritia” o “Pagonia”, comete pai puars. Testarde, la comete, che la sô aparizion e durà par doi mês, cun grande preocupazion dal soredit cont: «Colui che è padre delle seconde cause, ce manda talora questi segni precedenti a qualche flagello a fine che gli uomini pentendosi de’ suoi misfatti, vengano a incontrarsi la placazione della ira divina». Pe croniche, da pît dal sfuei, il cont al veve notât che daspò de aparizion di chê comete, a jerin muarts in doi: prime la Imperadore e po dopo l’imperadôr Matie.
Straordenarie, ancjemò, une comete comparide in Cjargne tal mês di Lui dal 1769, che e restà tal cîl fin ai 8 di Avost di chel an; une comete mai viodude prime, cu la code che si divideve in tantis fassinis, tant di fâle someâ a une scove di lûs. Ma une scove ce fasie? Vecje o gnove che e sedi, e fâs netisie. E chê comete, che e sedi stade, magari, une metafore celeste? Dut câs, tal diari che al ripuarte la conte di cheste aparizion, ae fin, ancje culì, si lei de pôre che la comete e stiçave par antîc: «Che cosa voglia significare nessuno lo sa, se non il sommo Iddio che ci guardi da ogni male». Benedete alore chê altre comete, chê di Betlem: chê, dabon, e à invezit puartât il ben intal mont.
Roberto Iacovissi
