A cressin a 147 i Comuns aderents a l’Assemblee di Comunitât Linguistiche Furlane (ACLiF), nassude intal 2015 e realtât istituzionâl ugnule ch’e met adun lis comunitâts dulà ch’e je fevelade e ricognossude la lenghe furlane. I gnûfs jentrâts a son il Comun di Manzan, centri conossût a nivel internazionâl pe sô industrie dal len e dal aredament, e chel di Torean, realtât inomenade pes sôs gjavis ch’e si tire fûr la preseade piere plasentine, parsore de produzion di vins di ecelence. Adesions decidudis za cualchi setemane indaûr ma che, pal rispiet dal periodi eletorâl, l’Assemblee e pant dome cumò.
“O din il benvignût a Manzan e Torean te nestre grande famee – al dîs il president da l’Assemblee Daniele Sergon, tornât di pôc a jessi elet sindic di Caprive -, dulà che lis aministrazions comunâls a àn sielt di aderî. Come che no mancjarìn mai di ricuardâ, fâ part da l’ACLiF e je une libare sielte dai Comuns, une decision ch’e nas e e cres dal bas. O tiarìn dentri, come che o vin za fat fin cumò cun chei altris gnûfs Comuns aderents, ancje Manzan e Torean intai nestris progjets: cunvignis e cors di formazion pai ents locâi, scambis di esperiencis cun chês altris minorancis linguistichis d’Italie, iniziativis par judâ i Comuns a spandi l’ûs de lenghe furlane e la cognossince de culture, poie a programs radiotelevisîfs”.
I Comuns aderents a l’ACLIF a son: Aquilee, Basilian, Bertiûl, Bicinins, Buie, Buri, Caprive, Cint, Claut, Clauzêt, Codroip, Colorêt di Montalban, Cjamin, Cjampfuarmit, Cjamplunc Tapoian, Cjarlins, Cjasarse, Cjassà, Cjastelnouf, Cjasteons di Strade, Cjavaç, Cjavàs, Cjopris e Viscon, Comelians, Cordovât, Cormons, Cosean, Cuar di Rosacis, Çarvignan, Çopule, Çurçuvint, Daèl, Damâr, Darbe, Darte, Dartigne, Davâr, Davian, Dignan, Dogne, Dolegne dal Cuei, Fane, Fare, Feagne, Flaiban, Flumisel La Vile, For Davuatri, For Disot, Forgjarie, Frisanc, Gardiscje, Glemone, Gonars, Gurize, Lauc, Lignan, Listize, Maian, Manià, Manzan, Marian, Martignà, Merêt di Tombe, Midun, Migjee, Mueç, Muimans, Monfalcon, Montenars, Morâr, Morsan da lis Aucjis, Mortean, Mosse, Muçane, Murùs, Osôf, Pagnà, Palaçûl, Palme, Paluce, Pasian di Prât, Paulâr, Paulêt, Pavie, Pontêbe, Porpêt, Premariâs, Prepot, Prissinins, Pucinìe, Puçui, Raviei, Reane dal Roiâl, Remanzâs, Resiute, Rigulât, Rivignan Teôr, Rivis Darcjan, Romans dal Lusinç, Roncjis, Rude, Ruvigne, San Denêl, San Lurinç Lisuntin, San Martin dal Tiliment, San Michêl dal Timent, San Quarin, San Vît dal Tiliment, San Vît de Tôr, San Vît di Feagne, San Zorç da la Richinvelde, San Zorç di Noiâr, San Zuan dal Nadison, Sauris, Scluse, Secuals, Sedean, Segrât, Siest, Spilimberc, Talmassons, Tarcint, Tarvis, Tavagnà, Tei, Tierç di Aquilee, Tor di Zuin, Torean, Tramonç Vildisore, Tramonç Vildisot, Trasaghis, Travês, Trep Grant, Trep Liussûl, Tresesin, Tumieç, Udin, Vençon, Verzegnis, Vildivar, Vile di Cjargne, Vilès, Visc, Vît, Voleson Darzin, Zui.
