Une gnove stagjon di “Maman!” plene di ligrie e di divertiment e je daûr a tacâ! La trasmission televisive in lenghe furlane e je une coproduzion tra la ARLeF – Agjenzie regjonâl pe lenghe furlane e Telefriuli. Al è un program che, cul divertiment, la narazion e il zûc al mene i fruts tal mont dal plurilinguisim e dai tancj vantaçs cognitîfs che si àn cul doprâ plui lenghis fin di piçui.
La date di tignî iniment e je chê di vinars ai 11 di Otubar. Come che al sucêt aromai di nûf edizions, Daria Miani, cun Vigji, il so tui inseparabil, e tornarà ducj i vinars aes 18.30 e in repliche la domenie aes 7 e aes 13 (Telefriuli – canâl 11 dt), par intratignî i fruts dai 4 ai 8 agns.
Une des novitâts di cheste stagjon e je la presince di Desiree Chiappo Debegnach, la simpatiche “vicine di cjase” de condutore. Cun Daria, a regalaran ai piçui telespetatôrs intratigniment educatîf e moments di zûc e di divertiment cun cartons animâts, leturis e musiche.
Cun di plui, a restin lis rubrichis di sucès tant che “Fasìn un zûc”, che e cjape dentri i fruts cun zûcs a domandis e “La cusine Bete”, la estrose “cusine” di Daria Miani (ven a stâi Daria stesse) protagoniste di esperiments e di piçui laboratoris cun lavoruts simpatics, che e contarà ancje tantis curiositâts sul Friûl e no dome. E torne ancje “Zuìn cu lis lenghis”, cun protagoniscj Max e Leo. I doi fradis une vore zovins, che a fevelin par inglês, par furlan e par talian in maniere fluente, si cjataran cun Daria par insegnâ ai piçui spetatôrs, in maniere lizere e legre, tantis peraulis inglesis e chês che ur corispuindin par furlan.
No podevin mancjâ po i cartons animâts, e tra chei “I Numaruts”, la version furlane di “Numberblocks”, la serie innomenade de BBC che e jude i plui piçui a imparâ a fâ di cont.
Dutis lis pontadis de stagjon numar 9 di Maman! – che e larà indenant fin al mês di Jugn – a saran ancje te tv on demand di Telefriuli, tal canâl YouTube e tal sît de ARLeF, là che si puedin za cjalâ lis pontadis des stagjons passadis. Cun di plui, tal sît i fruts a podaran cjatâ tancj altris contignûts simpatics su Maman!.
