Sabide ai 12 di Avrîl a son stâts disvelâts i nons dai vincidôrs de setime edizion di “Vôs de Basse”, il concors leterari in lenghe furlane inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel associât pe lenghe furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane.
Il premi pe sezion Traduzion al è lât a Elena Ermacora di San Zorç, cu la verison furlane di un tocut gjavât fûr de saghe fortunade di Harry Potter.
La sezion de Poesie e je stade une vore preseade de jurie, dade dongje di Benvenuto Castellarin (Societât Filologjiche Furlane), Ferdinando Passone (Radio Onde Furlane) e dal assessôr Alessio Cristin. In plui di segnalâ “Voiis” di Stefano Lobardi di Prissinins, di fat, a son stâts dâts doi ex aequo pal tierç premi: un a Angelo Bertoia di San Vît dal Tiliment, cun “L’inizi… e chê altre rive”, e un a Raffaele Serafini di Listize, cun “Aghe”.
Il secont premi al è lât a Vanni Minen di Puçui, cun “Anìn frut”, biel che il prin premi al è stât vinçût di “La strie dal timp” di Pierina Gallina di Codroip. Te sezion Narative, invezit, si son fats ricognossi Egle Taverna di Gurize, cuntune segnalazion a “Su lis alis dai siums”, Gianfranco Pellegrini di Reane, cun “I pas dal orcul” al tierç puest, di gnûf Pierina Gallina cun “Achilon” al secont puest e Diego Navarria di Cjarlins, che che cu lis sôs “Fufignis” al à concuistât il prin premi.
Ae fin de cerimonie e je stade presentade ancje la antologjie “Vôs de Basse II”, publicade dal Comun di San Zorç di Noiâr e de Societât Filologjiche Furlane, cun dentri i vincidôrs de cuarte, cuinte e seste edizion dal concors leterari.
La publicazion si le pues vê sore nuie li de biblioteche Vile Dora, baste domandâ.
