Ogni an, come par tradizion inte dì di Sante Catarine, la Societât Filologjiche Furlane e presente il Strolic furlan pal an gnûf. L’apontament al è par lunis ai 25 di Novembar aes 5 sot sere tal salon di onôr di Palaç Mantica in vie Manin 18 a Udin; la presentazion si podarà viodile ancje in direte streaming sul sît www.filologicafriulana.it. E presente Martina Delpiccolo, cu lis musichis dal Ensemble d’Anjou e lis leturis di Maria Dolores Miotto.
Il Strolic pal 2025 al è stât metût adun di Dani Pagnucco e al compagnarà i letôrs par dut il 2024 cun contis, poesiis e rubrichis scritis tes diviersis varietâts dal furlan: cundiplui a scrivin ogni mês Gianni Colledani, Angelo Floramo, Laurin Nardin, Gianluca Franco, Diego Lavaroni, Carlo Zanini. Simpri presints a son ancje i corsiscj dai cors pratics di lenghe furlane e i furlans sparniçâts pal mont, che a rivin a mantignî vive la nestre marilenghe.
I dissens a son di Annalisa Gasparotto, Oriana Cocetta e Genasio Romano che cul lôr stîl, il lôr sintî e la lôr man a insiorin la publicazion.
Za l’an passât il Strolic al veve fevelât dai flôrs plui biei dal nestri Friûl, e chest an il strolegant al va indevant sul stes troi, ma cheste volte nus presente lis rosis plui comunis, che salacor ducj o cognossìn ma che dispès i passìn parsore cence inacuarzisi di lôr: “la bielece che nus scjampe” al è duncje il teme dal Strolic di chest an, stant che a voltis no sin bogns di preseâ ce che no nus pâr vonde impuartant, masse cjapâts de esterioritât e dal vê. Invezit ancje un flôr che al cres ad ôr da la strade al è biel, e al parten a une des passe 6000 speciis che a cressin sul biel e variât teritori de nestre regjon, pandint une maraveose biodiversitât. Lis descrizions botanichis a son di Alberto Candolini e lis fotografiis di Serena Chiapolino. Lis didascaliis a presentin i nons sientific des plantis par latin, par talian e ancje par furlan.
Cul Strolic si presente ancje il “Lunari” de Filologjiche, stampât inte version di mûr cu la poie di Civibank e in chê di taule cu la poie de Regjon Autonome Friûl Vignesie Julie e de ARLeF.
